AITHIHYAMALA(ഐതിഹ്യമാല)

കൊട്ടാരത്തിൽ ശങ്കുണ്ണി(1855-1937)
കൊല്ലവർഷം 1030-ാമാണ്ട് മീനമാസം 23-ാം തീയതി (1855 മാർച്ച് 23) കോട്ടയത്ത് കോടിമതയിൽ കൊട്ടാരത്തിൽ വാസുദേവനുണ്ണിയുടെ രണ്ടാമത്തെ പുത്രനായി ജനിച്ചു. യഥാർത്ഥ പേര് വാസുദേവൻ. പാഠശാലകളിൽ പഠിച്ചിട്ടില്ല. പതിനേഴു വയസ്സിനുശേഷം മണർകാട്ടു ശങ്കര വാര്യരിൽനിന്ന് സിദ്ധരൂപം പഠിച്ചു. പിന്നീട് വയസ്‌കര ആര്യൻ നാരായണൻ മൂസ്സതിൽനിന്ന് രഘുവംശം, മാഘം, നൈഷധം മുതലായ കാവ്യങ്ങളിൽനിന്നുള്ള സർഗ്ഗങ്ങളും അഷ്ടാംഗഹൃദയം, ചികിത്സാക്രമം തുടങ്ങിയ വൈദ്യശാസ്ത്രഗ്രന്ഥങ്ങളും പഠിച്ചു. 36-ാം വയസ്സിൽ സുഭദ്രാഹരണമണിപ്രവാളം എന്ന കൃതി രചിച്ചു. 1904-ൽ 'കവിതിലകൻ' എന്ന സ്ഥാനവും മെഡലും കൊച്ചിരാജാവിൽനിന്ന് ലഭിച്ചു. തിരുവിതാംകൂർ, കൊച്ചി, ബ്രിട്ടീഷ് മലബാർ സംസ്ഥാനങ്ങളിൽനിന്നുമായി ഇത്രയധികം സമ്മാനങ്ങൾ ലഭിച്ച മറ്റൊരു കവിയില്ല. മൂന്നു വിവാഹം കഴിച്ചെങ്കിലും കുട്ടികളുണ്ടായില്ല. 1090-ൽ ആരംഭിച്ച എം.ഡി. സെമിനാരി ഹൈസ്‌കൂളിൽ ആദ്യ മലയാളം മുൻഷി ആയിരുന്നു. കൊല്ലവർഷം 1112 കർക്കടകം 7-ന് (1937 ജൂലൈ 22) നിര്യാതനായി.